កាលពីថ្ងៃទី០៦ ខែមិថុនា ឆ្នាំ២០២១ យុវជនប្រមាណ១០០នាក់ ភាគច្រើនជានិស្សិតមកពីបណ្តាសាកលវិទ្យាល័យ និងគ្រឹះស្ថានឧត្ដមសិក្សានានានៅក្នុងរាជធានីភ្នំពេញ និងតាមបណ្តាខេត្ត បានចូលរួមយុទ្ធនាការយុទ្ធនាការ “ហ្វ័រ អ“ មានរយៈពេល២០ថ្ងៃ និងសិក្ខាសាលាតាមរយៈកម្មវិធីZoom ក្រោមប្រធានបទស្ដីពី “ការប្រើប្រាស់ប្លាស្ទិកចាស់ៗឡើងវិញ“។
ជាការកត់សម្គាល់ កិច្ចពិភាក្សាបានផ្តោតលើការគ្រប់គ្រងការនាំចូលប្លាស្ទិក យុទ្ធសាស្រ្ត គោលនយោបាយគ្រប់គ្រង និងវិធីសាស្រ្តនៅក្នុងការការពារបរិស្ថាន ក៏ដូចជាការទុកដាក់និងគ្រប់គ្រងសំរាមប្លាស្ទិកទៅដល់រដ្ឋបាលថ្នាក់ជាតិ និងថ្នាក់ក្រោមជាតិដូចជាមន្ទីរបរិស្ថាន អាជ្ញាធរមូលដ្ឋាននៅតំបន់របស់ខ្លួនជាដើម។ រីឯការលើកឡើងដែលពាក់ព័ន្ធនិងអង្គការសង្គមស៊ីវិល និងម្ចាស់អាជីវកម្មភាគច្រើនផ្តោតទៅលើបទពិសោធន៍នៃយន្តការអនុវត្តល្អក្នុងការកាត់បន្ថយប្រើប្រាស់ប្លាស្ទិក បញ្ហាប្រឈម ការសម្រេចបាន ការលើកទឹកចិត្ត និងជម្រុញឲ្យពលរដ្ឋ និងអាជីវកម្មដទៃទៀតឈប់ ឬកាត់បន្ថយការប្រើប្រាស់ប្លាស្ទិក។
របាយការណ៍របស់ក្រសួងបរិស្ថានចេញផ្សាយឆ្នាំ២០១៨ និង២០១៩ បានបង្ហាញថាការចោលសំណល់រឹងនៅទីលានចាក់សំរាម មានការកើនឡើង៥ដង ចាប់ពី៣១៨,០០០តោននៅឆ្នាំ២០០៤ ដល់១.៧លានតោនក្នុងមួយឆ្នាំនៅឆ្នាំ២០១៨។ រីឯទីលានចាក់សំរាមទំាងអស់ក្នុងប្រទេសកម្ពុជា នឹងមិនអាចបន្តផ្ទុកសំណល់រឹងបានទេ ប្រសិនជាសំណល់រឹងបន្តកើនឡើងក្នុងល្បឿនដូចសព្វថ្ងៃ ជាពិសេសនៅទីក្រុងធំៗមួយចំនួនដូចជាក្រុងភ្នំពេញដែលផលិតសំរាមជាមធ្យម ២,២១៦តោនជារៀងរាល់ថ្ងៃ។ សំរាមក្នុងទីក្រុងត្រូវបានរកឃើញថាមានផ្ទុកប្លាស្ទិក (២១%) សំណល់សេរីរាង្គ (៥៥%) និងសំណល់ផ្សេងៗ។ បើយោងតាមមូលនិធិ ACRA Foundation បានឲ្យដឹងថាមានថង់ប្លាស្ទិកប្រហែល១០លានថង់ត្រូវបានប្រើប្រាស់នៅក្នុងរាជធានីភ្នំពេញជារៀងរាល់ថ្ងៃ ហើយប្រជាជនដែលរស់នៅទីក្រុងប្រើប្រាស់ថង់ប្លាស្ទិកជាង ២,០០០ថង់ជារៀងរាល់ឆ្នាំ។ ក្នុងឆ្នាំ២០១៧រដ្ឋាភិបាលកម្ពុជាបានចេញអនុក្រឹត្យមួយស្ដីពីការគ្រប់គ្រងថង់ប្លាស្ទិក ក្នុងគោលបំណងបង្កើនប្រសិទ្ធភាព កាត់បន្ថយការនាំចូល ការផលិត ចែកចាយ និងប្រើប្រាស់ថង់ប្លាស្ទិក ដើម្បីធានានូវកិច្ចគាំពារសុខភាពសាធារណៈ បរិស្ថាន និងសោភណ័ភាពទីក្រុង។ អនុក្រឹត្យដដែលនេះក៏បានចែងពីការកំណត់តួនាទី និងពង្រឹងការទទួលខុសត្រូវរបស់ក្រសួង ស្ថាប័នជំនាញ លើការនាំចូល ការផលិត ការចែកចាយ និងការប្រើប្រាស់ថង់ប្លាស្ទិក និងការកែច្នៃសំណល់ប្លាស្ទិក អប់រំនិងលើកកម្ពស់ការយល់ដឹងជាសាធារណៈ និងការចូលរួមរបស់ប្រជាពលរដ្ឋក្នុងការអនុវត្តកម្មវិធីកាត់បន្ថយការប្រើប្រាស់ថង់ប្លាស្ទិកនៅទូទាំងប្រទេសកម្ពុជា។ អនុក្រឹត្យនេះក៏មានចែងពីទោសបញ្ញតិដែលអាចមានជាការព្រមានជាលាយល័ក្ខអក្សរ ការដកហូតថង់ប្លាស្ទិកដែលល្មើសច្បាប់ ការផ្អាកអាជីវកម្មឬសកម្មភាពផលិតជាបណ្ដោះអាសន្ន ការផ្អាកឬដកហូតការអនុញ្ញាតក្នុងការនាំចូលឬការផលិតថង់ប្លាស្ទិកក្នុងស្រុក និងការពិន័យជាអន្តរការណ៏ជាដើម។
សិក្ខាសាលាបានស្នើសុំទៅក្រសួងដែលពាក់ព័ន្ធ ម្ចាស់អាជីវកម្ម និងពលរដ្ឋ ឲ្យជម្រុញ និងលើកទឹកចិត្តក្នុងការចូលរួមអនុវត្តក្របខ័ណ្ឌច្បាប់ និងគោលនយោបាយគ្រប់គ្រងប្លាស្ទិកដូចមានភ្ជាប់ជូនដូចខាងក្រោម៖
១. បន្ត និងពង្រឹងយន្តការទប់ស្កាត់ ការរិតត្បិតការនាំចូលប្លាស្ទិក តម្លើងពន្ធ ជាពិសេសផលិតផលពីប្លាស្ទិកដែលប្រើប្រាស់បានតែម្តងហើយបោះចោល
២. បន្ត និងបង្កើនការលើកទឹកចិត្តដល់ម្ចាស់អាជីវកម្មនានាដែលបានអនុវត្តគោលការណ៍ហ្វរអរដើម្បីកាត់បន្ថយការប្រើប្រាស់ប្លាស្ទិក តាមរយៈការបន្ធូរបន្ថយពន្ធជាដើម
៣. បង្កើនការលើកទឹកចិត្ត និងជម្រុញចំពោះម្ចាស់អាជីវកម្ម សិប្បកម្មកែច្នៃសំណល់ប្លាស្ទិក ឬប្រើប្រាស់ឡើងវិញ ដែលទាំងនេះក៏ជាដំណោះស្រាយចាំបាច់ និងបន្ទាន់មួយផងដែរ
៤. បង្កើនការផ្សព្វផ្សាយយ៉ាងតិច២ដងក្នុង១ខែ ពីផលប៉ះពាល់នៃការប្រើប្រាស់ប្លាស្ទិកនៅតាមទីផ្សារមិនទាន់រៀបរយ ដូចជាទីផ្សារបន្លែជាដើម និងជម្រុញឲ្យមានការកាត់បន្ថយនៃការប្រើប្រាស់។
រាជធានីភ្នំពេញ ថ្ងៃទី១១ ខែមិថុនា ឆ្នាំ២០២១
